खेड नगरपरिषद उपनगराध्यक्ष पदाच्या निवड प्रक्रियेला गुरुवारी वेग आला असून शिवसेना पक्षाचे अनुभवी नगरसेवक सतीश उर्फ पप्पू चिकणे यांनी अधिकृतरीत्या नामनिर्देशन पत्र दाखल केले. विशेष म्हणजे, खेड नगरपरिषद निवडणुकीत महायुतीने 21-0 असा अभूतपूर्व विजय मिळवून एकहाती सत्ता स्थापन केली होती. या एकहाती सत्तेमुळे उपनगराध्यक्षपदासाठी शिवसेनेच्या उमेदवाराची निवड सहज आणि बिनविरोध होणार असल्याचे चित्र स्पष्ट झाले आहे.

नामनिर्देशन प्रक्रियेच्या वेळी नगरपरिषद परिसरात मोठी उत्सुकता आणि उत्साहाचे वातावरण पाहायला मिळाले. शिवसेना पक्षाकडून उपनगराध्यक्ष पदासाठी फक्त एकच नामनिर्देशन पत्र दाखल झाल्याने कोणत्याही प्रकारची स्पर्धा दिसून आली नाही. त्यामुळे सतीश उर्फ पप्पू चिकणे यांची उपनगराध्यक्षपदी निवड आता केवळ औपचारिकता राहिली असून त्यांची निवड निश्चित मानली जात आहे. नामनिर्देशन दाखल करताना नगराध्यक्षा माधवी बुटाला, शिवसेना गटनेते निकेतन पाटणे तसेच शिवसेनेचे सर्व नगरसेवक मोठ्या संख्येने उपस्थित होते. संपूर्ण नगरपरिषदेत शिवसेनेची एकजूट आणि संघटनशक्ती स्पष्टपणे जाणवत होती. यावेळी शहरप्रमुख कुंदन सातपुते, संजय मोदी, मिनार चिखले यांच्यासह अनेक शिवसैनिक हजर होते.

पप्पू चिकणे हे खेड नगरपरिषदेतील लोकप्रिय आणि अनुभवी नेते मानले जातात. त्यांनी गेल्या अनेक वर्षांत विविध विकासकामांमध्ये पुढाकार घेत नगरपरिषद प्रशासनात महत्त्वपूर्ण भूमिका बजावली आहे. शांत स्वभाव, प्रभावी समन्वयक क्षमता आणि सर्वसमावेशक दृष्टीकोन या गुणांमुळे कार्यकर्त्यांमध्ये त्यांची चांगली छाप आहे. उपनगराध्यक्ष पदाची सूत्रे त्यांच्या हाती आल्यावर खेड शहरातील प्रलंबित कामांना गती मिळेल, असा विश्वास नागरिकांमध्ये व्यक्त होत आहे.
21-0 या महायुतीच्या ऐतिहासिक विजयामुळे खेड नगरपरिषदेतील सत्तेची समीकरणे पूर्णपणे बदलली असून विपक्षाचा आवाज गायब झाला आहे. त्यामुळे आगामी काळात शहरातील विकासकामांबाबत निर्णय प्रक्रियेला अडथळ्याविना गती मिळण्याची शक्यता आहे. पाणीपुरवठा, रस्ते तसेच शहरातील अनेक प्रलंबित महत्वाच्या विषय लवकरच पूर्णत्वास जातील अशी चर्चा शहरात सुरू आहे.
उपनगराध्यक्षपदाच्या निवडणुकीची अधिकृत घोषणा गुरुवारी दुपारी 2.30 होणार आहे. मात्र सर्व राजकीय परिस्थिती पाहता सतीश उर्फ पप्पू चिकणे हेच खेड नगरपरिषदेचे नवे उपनगराध्यक्ष बनणार हे निश्चित झाले आहे. शिवसेनेची एकहाती सत्ता आणि संघटनातील एकजूट यामुळे खेडच्या राजकारणात नव्या पर्वाची सुरूवात झाल्याची चर्चा शहरभर रंगली आहे.

रत्नागिरी स्थानिक गुन्हे अन्वेषण शाखेच्या पथकाने एम.आय.डी.सी. परिसरात केलेल्या कारवाईत तब्बल ₹3 कोटी 10 लाख 30 हजार रुपयांचे “लुप्तप्राय प्रजातीच्या माशाची उलटी” म्हणजेच अंबरग्रीस जप्त करण्यात आले असून, तिघा आरोपींना अटक करण्यात आली आहे. या कारवाईने जिल्ह्यातील वन्यजीव उत्पादक वस्तूंच्या अवैध व्यापारावर मोठा आळा बसला आहे.

स्थानिक गुन्हे शाखेच्या पथकाला दिनांक 31 ऑक्टोबर रोजी गुप्त माहिती मिळाली की काही इसम एम.आय.डी.सी., रत्नागिरी परिसरात बाफना मोटर्सजवळ अंबरग्रीस विक्रीसाठी येणार आहेत. त्यानुसार पोलिस निरीक्षक नितीन डेरे यांच्या मार्गदर्शनाखाली तातडीने पथक तयार करण्यात आले आणि एम.आय.डी.सी. परिसरात सापळा रचण्यात आला. पथकाने कारवाई करत तिघांना पकडले. अटक केलेल्या आरोपींची नावे – रोहित रमेश चव्हाण (रा. आंबेशेत), आसिफ अस्लम मोरस्कर (रा. पिंपरी बुद्रुक, चिपळूण) आणि तेजस परशुराम कांबळे (रा. आडरे, चिपळूण) अशी आहेत. त्यांच्या ताब्यातून सुमारे 3 किलो 4 ग्रॅम वजनाचे अंबरग्रीस आणि एक चारचाकी वाहन असा मुद्देमाल जप्त करण्यात आला. जप्त केलेल्या वस्तूची एकूण किंमत ₹3,10,30,000 इतकी असल्याचे पोलिसांनी सांगितले.

या तिघांकडे कोणतीही परवानगी नसताना त्यांनी विक्रीच्या उद्देशाने अंबरग्रीस बाळगले असल्याने त्यांच्या विरोधात रत्नागिरी ग्रामीण पोलिस ठाण्यात वन्यजीव (संरक्षण) अधिनियम 1972 अंतर्गत गुन्हा दाखल करण्यात आला आहे. ही कारवाई मा. पोलिस अधीक्षक नितीन दत्तात्रय बगाटे, अपर पोलिस अधीक्षक बी.बी. महामुनी यांच्या मार्गदर्शनाखाली पोलिस निरीक्षक नितीन डेरे यांच्या नेतृत्वात करण्यात आली. या कारवाईत श्रेणी. पो.ऊ.नि. प्रशांत बोरकर, पो.हेकॉ. बाळू पालकर, गणेश सावंत, प्रवीण खांबे, सत्यजित दरेकर आणि चालक पो.कॉ. अतुल कांबळे यांनी सहभाग घेतला.

राज्यभरात मुसळधार पावसामुळे अतिवृष्टीची परिस्थिती निर्माण झाली आहे. अनेक जिल्ह्यांमध्ये रस्ते वाहतुकीसह सर्वसामान्यांचे जनजीवन विस्कळीत झाले आहे. या गंभीर परिस्थितीत राज्य सरकारकडून बचावकार्य व जनतेला मदत पुरवण्यासाठी विविध विभाग कार्यरत आहेत. अशा वेळी एसटी महामंडळाच्या २५१ पैकी ३४ आगारांतील आगारप्रमुख हे आपल्या कर्तव्यातून गैरहजर राहिल्याचे स्पष्ट झाले आहे. ही गंभीर व निष्काळजी वागणूक मानली जाऊन संबंधितांवर कठोर कारवाई करण्याचे आदेश परिवहन मंत्री प्रभात सरनाईक यांनी दिले आहेत.

परिवहन मंत्री सरनाईक म्हणाले की, या अतिवृष्टीमुळे जनतेसमोर अनेक अडचणी निर्माण झालेल्या आहेत. अशा स्थितीत आगारप्रमुखांनी आपल्या जबाबदारीचे भान ठेवून उपस्थित राहणे अपेक्षित असताना, अनेकांनी अनुपस्थित राहून गैरजबाबदारपणा दाखवला आहे. त्यामुळे तातडीने चौकशी करून दोषींवर निलंबनासह कठोर शिस्तभंगाची कारवाई होईल. आगारप्रमुखांच्या गैरहजेरीमुळे प्रशासन अडचणीत आले असून, महामंडळाच्या प्रतिष्ठेलाही तडा गेला आहे.

राज्याच्या अनेक भागांमध्ये रस्ते पाण्याखाली गेले आहेत, वाहतूक ठप्प झाली असून प्रवाशांचे मोठे हाल होत आहेत. अशा स्थितीत आगारप्रमुखांची उपस्थिती अत्यावश्यक असते. कारण त्यांच्या मार्गदर्शनाखाली कर्मचारी प्रवासीसेवा सुरळीत ठेवण्यासाठी प्रयत्नशील राहतात. मात्र काही आगारप्रमुख गैरहजर राहिल्याने परिस्थिती हाताळणे कठीण झाले. यामुळे सामान्य जनतेला मोठ्या प्रमाणावर त्रास सहन करावा लागला आहे. सरकारी यंत्रणेप्रमाणे एसटी महामंडळालाही बचावकार्य आणि आवश्यक सुविधा पुरविण्यात मोलाची भूमिका बजवावी लागते. त्यामुळे जबाबदारी टाळणाऱ्या अधिकाऱ्यांना सोडले जाणार नाही, असा स्पष्ट इशारा देत प्रभात सरनाईक यांनी यापुढे कोणतीही निष्काळजीपणा सहन केला जाणार नाही, असेही सांगितले.

याप्रकरणी दोषींवर कडक शिस्तभंगाची कारवाई करण्याचे आदेश देण्यात आले असून, विभागीय नियंत्रकांकडून तपास अहवाल मागविण्यात आला आहे. शिस्तीचा अभाव आणि निष्काळजीपणामुळे जनतेला होणारा त्रास टाळण्यासाठी प्रशासन ठोस पावले उचलणार असल्याचे परिवहन मंत्री सरनाईक यांनी नमूद केले.

एखाद्या व्यक्तीचे कर्तृत्व हे तिच्या वैयक्तिक यशातच नव्हे तर समाजाला दिलेल्या दिशेत, उभारीत आणि निर्माण झालेल्या विश्वासात मोजले जाते. चिपळूण नागरी सहकारी पतसंस्थेच्या मुख्य कार्यकारी अधिकारी आणि वाशिष्ठी डेअरीच्या मुख्य प्रवर्तक सौ. स्वप्ना प्रशांत यादव यांचा १ सप्टेंबर हा जन्मदिवस अशाच एका विलक्षण व्यक्तिमत्त्वाचा साक्षीदार ठरला. कर्तृत्व, करुणा आणि कुशल व्यवस्थापनाचा संगम असलेल्या या “मिसेस परफेक्शनिस्ट” यांना वाढदिवसाच्या शुभेच्छांचा वर्षाव होत आहे.
सौ. स्वप्ना यादव या सहकारमहर्षी मा. सुभाषराव चव्हाण यांच्या कन्या. वडिलांकडून मिळालेला प्रामाणिकपणा, शिस्त आणि समाजाशी असलेले नाते हे त्यांचे सर्वात मोठे भांडवल मानून त्यांनी आपल्या कार्यशैलीत त्याचा वारसा जपला आहे.
राजकीय क्षेत्रातही त्यांचे योगदान तितकेच महत्त्वाचे आहे. पती श्री. प्रशांत यादव यांच्या राजकीय प्रवासात त्या सदैव आधारस्तंभ ठरल्या आहेत. नुकत्याच झालेल्या चिपळूण-संगमेश्वर विधानसभा निवडणुकीतील प्रचार नियोजन असो वा १९ ऑगस्ट रोजी यादव साहेबांच्या भाजप प्रवेश सोहळ्याचे व्यवस्थापन – प्रत्येक ठिकाणी स्वप्ना ताईंनी केलेले परिश्रम आणि काटेकोर नियोजन दिसून आले. तब्बल १६०० समर्थकांसह ५८७ गाड्यांचा ताफा मुंबईत सुरक्षित ने-आण करण्याचे नियोजन त्यांच्या व्यवस्थापन कौशल्याची जाणीव करून देणारे ठरले.
उद्योजकतेतही त्यांनी वेगळी ओळख निर्माण केली आहे. चिपळूण नागरी सहकारी पतसंस्थेच्या कारभारातील पारदर्शकता आणि विश्वासार्हतेबरोबरच वाशिष्ठी डेअरीच्या उभारणीत शेतकरी, महिला आणि युवकांना रोजगाराची संधी देण्याचे त्यांचे योगदान लक्षणीय आहे. केवळ उद्योग नव्हे तर समाजाच्या फायद्यासाठी त्यांनी दोन भव्य कृषी महोत्सवांचे यशस्वी आयोजन केले, ज्यातून शेतकऱ्यांना आधुनिक तंत्रज्ञान व नव्या प्रयोगांची माहिती मिळाली.
स्वप्ना मॅडम यांचे व्यवस्थापन कौशल्य केवळ अधिकाऱ्यांना व कर्मचाऱ्यांनाच नव्हे तर कार्यकर्त्यांनाही प्रेरणा देते. महिला सक्षमीकरणासाठी त्यांनी बचत गटांच्या माध्यमातून महिलांना आधार दिला आहे. कृषी महोत्सवात महिलांसाठी मोफत स्टॉल उपलब्ध करून देऊन त्यांना आर्थिकदृष्ट्या सक्षम होण्याची संधी दिली. त्यामुळे कार्यकर्त्यांपासून महिलांपर्यंत सर्वजण त्यांना आत्मीयतेने “ताई” म्हणून संबोधतात.
समाजकार्य, उद्योग, राजकारण आणि कौटुंबिक जबाबदाऱ्या अशा सर्व क्षेत्रांमध्ये समतोल राखणाऱ्या सौ. स्वप्ना यादव यांचे व्यक्तिमत्त्व प्रेरणादायी आहे. संघर्षातून उमललेले फूल, व्यवस्थापनातून उजळलेला दीपस्तंभ आणि समाजाशी असलेला जिव्हाळा – ही त्यांची खरी ओळख आहे.
त्यांच्या वाढदिवसानिमित्त केवळ शुभेच्छाच नव्हे, तर त्यांच्या कार्याचा गौरव समाजात होत आहे. त्यांच्या आयुष्याला उत्तम आरोग्य, निरंतर आनंद आणि अखंड कर्तृत्व लाभो, अशी प्रार्थना यानिमित्ताने करण्यात येत आहे.

दिनांक २० ऑगस्ट २०२५ रोजी पाचाड येथे ग्रामस्थांना मोठा धोका टळला. श्री. सहदेव चिले यांच्या गुरांच्या गोठ्यात माळ्यावर ठेवलेल्या पेंढ्यामध्ये तब्बल ८ ते ९ फूट लांबीचा अजगर आढळून आला. हा प्रकार लक्षात येताच त्यांनी तत्काळ वन विभागास माहिती दिली. माहिती मिळताच वन विभागाचे मा. वन परिक्षेत्र अधिकारी, चिपळूण श्री. एस. एस. खान, वनरक्षक रामपूरचे श्री. राहुल गुंठे, वाहन चालक श्री. नंदकुमार कदम आणि सर्पमित्र श्री. प्रथमेश पवार हे तातडीने घटनास्थळी दाखल झाले. त्यांनी सावधगिरीने आणि कौशल्यपूर्ण पद्धतीने सदर अजगर सुरक्षितरीत्या पकडून रेस्क्यू केला. तपासणीत अजगर सुस्थितीत असल्याची खात्री झाल्यानंतर त्याला पुन्हा त्याच्या नैसर्गिक अधिवासात मुक्त करण्यात आले.

ही संपूर्ण कारवाई मा. विभागीय वन अधिकारी रत्नागिरी (चिपळूण) सौ. गिरिजा देसाई व मा. सहाय्यक वन संरक्षक रत्नागिरी (चिपळूण) यांच्या मार्गदर्शनाखाली पार पडली. स्थानिक ग्रामस्थांनी वन विभागाच्या तत्परतेचे आणि सर्पमित्रांच्या धाडसाचे कौतुक केले आहे.

वाशिष्ठी नदीचे पुराचे पाणी ओसरल्यानंतर मौजे काळंबस्ते येथे शेतात तब्बल १२ फूट लांबीची मगर आढळून आली. हा प्रकार आज शुक्रवार दि. २२ ऑगस्ट रोजी घडला. शेतकरी श्री. प्रशांत घोरपडे यांच्या शेतात मगर दिसताच त्यांनी तत्काळ वन विभागास याची माहिती दिली.

या घटनेची माहिती मिळताच वन विभागाचे अधिकारी आणि कर्मचारी तातडीने घटनास्थळी दाखल झाले. या बचाव मोहिमेत मा. वन परिक्षेत्र अधिकारी, चिपळूण श्री. एस. एस. खान, वनरक्षक रामपूर येथील श्री. राहुल गुंठे, वनरक्षक फिरते पथकातील श्री. दत्ताराम सुर्वे, श्री. विशाल पाटील, श्री. प्रणित कोळी, वनरक्षक आबलोली येथील श्री. कुमार पवार, वाहन चालक श्री. नंदकुमार कदम, वॉचमन श्री. संजय अंबोकर, श्री. सचिन भैरवकर तसेच सर्पमित्र श्री. शिवराज शिर्के, श्री. प्रणित काळकुटकी, श्री. प्रथमेश पवार आणि श्री. सुरेंद्र भोंडवे यांनी सहभाग घेतला. यावेळी या मगरीस पिंजऱ्यात जेरबंद करून सुरक्षित रित्या ताब्यात घेण्यात आले. तपासणीत ती सुस्थितीत असल्याची खात्री झाल्यानंतर मगरीस तिच्या नैसर्गिक अधिवासात पुन्हा मुक्त करण्यात आले.

ही संपूर्ण बचाव मोहीम मा. विभागीय वन अधिकारी चिपळूण सौ. गिरिजा देसाई व मा. सहाय्यक वन संरक्षक सौ. प्रियांका लगड यांच्या मार्गदर्शनाखाली पार पाडण्यात आली. वन विभागाच्या तत्पर कारवाईमुळे मोठी दुर्घटना टळली असून स्थानिक ग्रामस्थांनी वन विभागाच्या या कार्याचे कौतुक केले आहे.

आगामी गणेशोत्सवाच्या पार्श्वभूमीवर जादा भाडे आकारणाऱ्या खासगी कंत्राटी प्रवासी बस व रिक्षा यांचे विरुध्द वाहन क्रमांक व प्रवासाच्या तपशीलासह उप प्रादेशिक परिवहन कार्यालयाच्या ई-मेल आयडी dyrto.08-mh@gov.in अथवा 8275101779 या कार्यालयाच्या व्हॉटसअप क्रमांकावर तक्रार दाखल करावी, असे आवाहन उप प्रादेशिक परिवहन अधिकारी राजवर्धन करपे यांनी केले आहे.

जिल्हयातील प्रवाशी रिक्षांच्या मनमानी भाडे आकारणी बाबत प्रादेशिक परिवहन प्राधिकरणातर्फे तयार करण्यात आलेला भाडेदर तक्ता (मीटरप्रमाणे व शेअर रिक्षा) हा जिल्हयातील विविध रिक्षा थांब्यावर प्रदर्शित करण्यात आला आहे.

महाराष्ट्र राज्य मार्ग परिवहन महामंडळाचे त्या त्या संवर्गातील टप्पा वाहतुकीचे सद्यस्थितीचे भाडेदर विचारात घेवून खाजगी कंत्राटी परवाना वाहनाचे त्या संवर्गासाठी संपूर्ण बससाठी येणाऱ्या प्रति कि. मी. भाडेदराच्या 50 टक्के पेक्षा अधिक राहणार नाही असे कमाल भाडेदर 27 एप्रिल 2018 रोजीच्या शासन निर्णयानुसार निश्चित केले आहेत.

वारसा स्थळ घोषित केल्यास जैवविविधता ऱ्हास रोखण्यास मदत –जिल्हाधिकारी

आंजर्ले ता. दापोली आणि वेळास ता. मंडणगड येथील समुद्रकिनाऱ्यांना जैवविविधता वारसा स्थळ म्हणून घोषित करण्याचा निर्णय घेण्यात आला आहे. जिल्हाधिकारी एम. देवेंद्र सिंह यांच्या अध्यक्षतेखाली जिल्हास्तरीय जैविक विविधता व्यवस्थापन समितीची बैठक संपन्न झाली.
या बैठकीत जिल्हाधिकारी श्री. सिंह म्हणाले की, जैवविविधता ही पर्यावरणीय सुरक्षा आणि मानवी कल्याणाशी निगडीत असल्याने अशा ठिकाणांची नोंद घेऊन त्यांना वारसा स्थळ म्हणून घोषित करणे अत्यंत गरजेचे आहे. त्यामुळे नैसर्गिक संपत्तीचे रक्षण होईल तसेच जलद गतीने होणारा जैवविविधतेचा ऱ्हास रोखता येईल. मौजे आंजर्ले आणि मौजे वेळास या ठिकाणी ऑलिव्ह रिडले कासवांची अंडी घालण्याची ठिकाणे प्रसिद्ध असून, या कासवांच्या संवर्धनासाठी स्थानिक लोकसहभाग वाढविणे आवश्यक आहे. यामुळे कासवांचे संरक्षण होऊन पर्यटनालाही चालना मिळेल, असे ते म्हणाले. या ठिकाणी जैवविविधता वारसा स्थळ घोषित करण्यासाठी आवश्यक प्रस्ताव प्राप्त झाल्यानंतर ना हरकत प्रमाणपत्र समितीच्या मंजुरीने तातडीने देण्यात येईल, असेही त्यांनी स्पष्ट केले. या बैठकीत विभागीय वन अधिकारी, रत्नागिरी (चिपळूण) यांनी ऑलिव्ह रिडले कासव संवर्धन व त्याचे महत्त्व याबाबत सादरीकरण केले.

आंजर्ले आणि वेळास समुद्र किनाऱ्याच्या ठिकाणी जैवविविधता वारसा स्थळ घोषित करण्याचा निर्णय

रत्नागिरी जिल्ह्यात गेल्या काही दिवसांपासून कोसळत असलेल्या मुसळधार पावसामुळे जिल्ह्यातील अनेक नद्या धोक्याच्या पातळीवर पोहोचल्या आहेत. पाटबंधारे विभागाने दिलेल्या अहवालानुसार आज सकाळी ९.३० वाजेपर्यंत विविध नद्यांची पाणीपातळी वाढलेली असून काही ठिकाणी ती धोक्याच्या वर गेली आहे.

जगबुडी नदीची पाणीपातळी खेड-भरणे पुलावर ७.१० मीटर इतकी नोंदली असून ती धोक्याच्या पातळीवर गेली आहे. तर वाशिष्ठी नदी चिपळूण बाजार पुलावर ४.६८ मीटर, शास्त्री नदी संगमेश्वर पुलावर ६.५० मीटर, काजळी नदी लांजा-अंजनारी पुलावर तब्बल १६.०७ मीटर, कोदवली नदी राजापूर पुलावर ८.५५ मीटर तसेच बावनदी नदी संगमेश्वर येथे ९.१० मीटर इतकी पातळी नोंदवली गेली असून या सर्व नद्या इशारा पातळीच्या वर गेल्या आहेत.

दरम्यान, सोनवी नदी व मुक्कुंडी नदी धोक्याच्या पातळीच्या खाली असली तरी सातत्याने वाढत आहे. त्यामुळे या भागातील नागरिकांनी सतर्क राहण्याचे आवाहन प्रशासनाकडून करण्यात आले आहे.
नद्यांचा वाढता वेग व पातळी पाहता नदीकाठच्या गावांमध्ये पूरस्थिती निर्माण होण्याची शक्यता वर्तवण्यात येत आहे. जिल्हा प्रशासनाने आपत्ती व्यवस्थापन यंत्रणा सज्ज ठेवली असून नागरिकांनी अफवांवर विश्वास न ठेवता अधिकृत सूचनांचे पालन करावे, असे आवाहन करण्यात आले आहे.

दापोली तालुक्यातील वाकवली–उन्हावरे मुख्य रस्त्यावर असणाऱ्या असोंड गावातील एसटी स्टँडवरून कुंभारवाडीकडे जाणारा रस्ता आणि मोरी अतिवृष्टीमुळे पूर्णपणे वाहून गेली. त्यामुळे गणेशवाडी तसेच अर्धी कुंभारवाडी या वस्त्यांचा गावाशी संपर्क तुटला असून शेकडो नागरिक अडचणीत आले आहेत.१६ व १७ ऑगस्ट रोजी झालेल्या मुसळधार पावसामुळे रस्त्याशेजारील ओढा भरून वाहू लागला. प्रचंड पाण्याच्या लाटांनी मोरी वाहून गेली आणि त्याचबरोबर रस्ताही खचून गेला. या रस्त्यावरील मोरीवरूनच नळपाणी योजनेचा मार्ग असल्याने पाणीपुरवठाही विस्कळीत झाला आहे. रस्त्यालगत असलेली गावाची पिण्याच्या पाण्याची विहीर देखील आता नागरिकांसाठी दुर्गम ठरली आहे.

हा रस्ता वाकवली–असोंड–उन्हावरे मुख्य रस्त्याला जोडणारा असल्याने नेहमीच वाहतुकीने गजबजलेला असतो. दोन वर्षांपूर्वी या रस्त्याचे डांबरीकरण करण्यात आले होते. त्याचवेळी ग्रामपंचायतीने मोरीच्या जागी पुलाची मागणी केली होती. मार्च २०२३ पूर्वी जिल्हा परिषद विभागाकडेही या संदर्भात लेखी पत्र पाठवण्यात आले होते. मात्र अद्याप मंजुरी न मिळाल्यामुळेच ही आपत्ती ओढवली असल्याचे स्थानिक ग्रामस्थांचे म्हणणे आहे.

या घटनेनंतर असोंड-शिवनारी ग्रुप ग्रामपंचायतीचे उपसरपंच दिपक देवरुखकर, माजी सरपंच व विद्यमान सदस्य मनिषा करमरकर, तसेच दिपक परबलकर यांनी सांगितले की, “दरवर्षी पावसाळ्यात हा रस्ता खचतो. पुलाची मागणी वारंवार केली असूनही शासन व जिल्हा परिषद विभागाकडून कोणताही प्रतिसाद मिळालेला नाही. शासनाने तातडीने पावले उचलली नाहीत तर नागरिकांचे हाल आणखी वाढतील.” या घटनेची माहिती मिळताच सरपंच, उपसरपंच, ग्रामपंचायतीचे सदस्य तसेच गावातील प्रकाश माणके, चंद्रकांत परबलकर, रघुनाथ परबलकर, मनोहर परबलकर यांसह अनेक ग्रामस्थांनी घटनास्थळी जाऊन पाहणी केली.

याबाबत जिल्हा परिषद दापोली बांधकाम विभागाच्या अधिकाऱ्यांशी संपर्क साधला असता त्यांनी सांगितले की, सदरचा रस्ता हा असोंड ग्रामपंचायतीच्या अख्त्यारीत येतो. घटनास्थळाची माहिती घेतली जाईल आणि तात्पुरत्या स्वरूपात रस्ता तयार करून नागरिकांची गैरसोय होऊ नये यासाठी उपाययोजना केली जातील.

कोकण आणि पश्चिम महाराष्ट्रातील घाट परिसरात धरण साठ्यात वाढ, नदी-नाल्यांना पूर, आणि दरड कोसळण्याची शक्यता असल्यामुळे नागरिकांनी सतर्क राहण्याचे आवाहन

मध्य भारतावर एक कमी दाबाचा पट्टा निर्माण होत आहे आणि याच्या प्रभावामुळे कोकण, मध्य महाराष्ट्र (प्रामुख्याने घाट परिसर),  मुंबई महानगर प्रदेश, आणि मराठवाड्यात (प्रामुख्याने पश्चिम आणि दक्षिण भाग) 18 ते 19 ऑगस्ट दरम्यान जोरदार पावसाची शक्यता वर्तविण्यात आली आहे. यात प्रामुख्याने कोकणातील सर्वच जिल्हे; नाशिक, पुणे, सातारा, सांगली, कोल्हापूर, पालघर, ठाणे, उर्वरित मुंबई महानगर; सोलापूर, धाराशिव, आणि लातूर जिल्ह्यांचा काही भाग यांचा समावेश आहे.  या दरम्यान खान्देश आणि उर्वरित मराठवाड्यात देखील मध्यम ते जोरदार पावसाचा अंदाज आहे. तुलनेत विदर्भात हलका ते मध्यम स्वरूपाचा पाऊस अपेक्षित आहे. या दरम्यान कोकण आणि पश्चिम महाराष्ट्रातील घाट परिसरातील धरण साठ्यात वाढ होऊन नदी-नाल्यांना पूर येण्याची शक्यता आहे. तसेच काही प्रमाणात दरड कोसळणे, आणि सखल भागांमध्ये पूरस्थिती निर्माण होऊ शकते, ज्यामुळे नागरिकांनी सतर्क राहावे, असे आवाहन राज्याच्या आपत्ती व्यवस्थापन विभागाकडून करण्यात आले आहे.

संजय कदमांना AB फॉर्म दिला नाही

कोकण हा शिवसेनेचा बालेकिल्ला असून पक्ष फुटीनंतर येथील शिवसेनेत ही दोन गट पडले आहेत. एकीकडे शिवेसना नेते आणि माजी खासदार विनायक राऊत, वैभव नाईक, राजन साळवी यांच्या नेतृत्वात शिवसेना ठाकरे गट तर दुसरीकडे शिवसेना नेते रामदास कदम, विद्यमान मंत्री दीपक केसरकर आणि मंत्री उदय सामंत यांच्या नेतृत्वात शिंदेंची शिवसेना सक्रीय आहे. त्यातच, आता शिंदेंच्या शिवसेनेत निलेश राणेंचा प्रवेश झाल्यामुळे कोकणातील राजकारण वेगळ्याच वळणावर गेलंय. दरम्यान, विधानसभा निवडणुकांसाठी कोणताील उमेदवारांची नावे जाहीर होत आहेत. शिवसेना ठाकरे गटाच्या पहिल्याच यादीत 5 उमेदवारांची नावे जाहीर झाली असून दापोली मतदारसंघातून संजय कदम यांची उमेदवारी जाहीर करण्यात आली आहे. मात्र, संजय कदम यांची उमेदवारी बदलली जाईल, असा दाव शिवसेना युवा नेते योगेश कदम यांनी केला आहे. योगेश कदमांच्या या दावाने कोकणातील राजकारणात खळबळ उडाली आहे. विशेष म्हणजे, आदित्य ठाकरेंचा दौरा रद्द होण्यामागे हेच कारण असल्याचंही त्यांनी सूचवलंय. माजी मंत्री आणि शिवसेना नेते आदित्य ठाकरे यांचा दौरा रद्द का झाला याबाबत मला माहिती नाही. दापोलीमधून उद्धव गटाचा उमेदवार बदलला जाऊ शकतो, असे योगेश कदम यांनी म्हटले आहे. संजय कदम यांनी केवळ उमेदवारी अर्ज भरलाय त्यांना पक्षाकडून एबी फॉर्म देण्यात आलेला नाही, असा खळबळजनक दावा शिंदे गटाचे दापोलीचे उमेदवार आमदार योगेश कदम यांनी केला आहे. 29 तारखेनंतर आदित्य ठाकरे दापोली दौऱ्यावरती येतील, त्यांच्या मनातल्या उमेदवाराला एबी फॉर्म देतील, अशी माझ्याकडे खात्रीलायक माहिती आहे, असा दावाच दापोलीतील शिवसेना शिंदे गटाचे उमेदवार योगेश कदम यांनी केलाय. पंतप्रधान नरेंद्र मोदी आणि अमित शहा यांनी कोकणला झुकते माप दिल्यामुळे लोकसभा निवडणुकीच्या काळात कोकणातून धनुष्यबाण हद्दपार झाले, असे टीका करणाऱ्यांना ही मोठी चपराक असल्याचंही योगेश कदम यांनी म्हटले आहे. तसेच, कोकणातील जनता शिवसेनेसोबत आहे, हे 23 तारखेला पुन्हा एकदा सिद्ध होईल, असा विश्वासही त्यांनी व्यक्त केलाय.

संपूर्ण व्हिडिओ पाहण्यासाठी खालील लिंकवर क्लिक करा

https://youtube.com/shorts/C7REyurt8Rk?feature=share

खेड तालुक्यातील हेदली येथे रविवार दि. 21 जानेवारी रोजी झालेल्या बैलगाडा स्पर्धेत बैल उधळून स्पर्धा पाहण्यासाठी आलेल्या प्रेक्षकांमध्ये शिरला होता. या दुर्घटनेत एका 5 वर्षाच्या मुलीला दुखापत झाली होती. यावेळी स्वतःच्या जीवाची पर्वा न करता त्या मुलीला खांद्यावर टाकून 300 मीटर धावत येवून तिला तत्काळ उपचारासाठी रुग्णालयात हलवले. अशा धाडसी पोलीस कर्मचारी संपत गीते यांचा दापोली खेड मंडणगड चे आमदार योगेश रामदास कदम व लायन्स क्लब ऑफ खेड सिटीच्या यांच्या वतीने आज सोमवार दि. 22 रोजी खेड शहरातून निघालेल्या शोभायात्रे दरम्यान शाल श्रीफळ व पुष्पगुच्छ देवून सक्तार करून सन्मान करण्यात आला.

उध्दव बाळासाहेब ठाकरे गटाच्या दापोली विधानसभा मतदार संघाच्या संघटक पदी म्हाप्रल येथील बिलाल म्हळूनकर यांची निवड करण्यात आली आहे. माजी केंद्रीय मंत्री अनंत गीते, जिल्हाध्यक्ष सचिन कदम यांनी नियुक्ती पात्र देवून ही नियुक्ती जाहीर केली. बिलाल म्हाळूनकर यांची संघटकपदी निवड झाल्यामुळे कार्यकर्त्यांमध्ये उत्साहाचे वातावरण आहे. म्हाळूनकर यांनी यापूर्वी तालुका, जिल्हा व राज्य स्तरावरील विविध पदे भूषवली आहेत. त्यांचा समाजातील दांडगा जनसंपर्क व त्यांच्या कामाच्या अनुभवाचा उपयोग उध्दव बाळासाहेब ठाकरे गटाला संघटना वाढीसाठी निश्चित होईल असे मत सर्वसामान्य कार्यकर्त्यां मधून व्यक्त करण्यात येत आहे

राज्यातील सर्व धार्मिक स्थळांना लाखोच्या संख्येने भाविक भेट देत असतात. भाविकांचे श्रद्धास्थान असणारे ही ठिकाणे स्वच्छ आणि सुंदर राहिली पाहिजेत. त्यासाठी या धार्मिक स्थळांच्या स्वच्छतेसाठी कायमस्वरुपी योजना राबविण्याची आणि यासाठी आवश्यक निधी उपलब्ध करुन देण्याची घोषणा मुख्यमंत्री एकनाथ शिंदे यांनी केली.

यावेळी मुख्यमंत्री शिंदे म्हणाले की, राज्यातील धार्मिक स्थळांवरील इमारतींची स्वच्छता संबधित ट्रस्टमार्फत होत असते. परंतू बाहेरील भागात अस्वच्छता कायम राहते. यामुळे भाविकांना त्रास होत असतो. याची गंभीर दखल घेत प्रधानमंत्री नरेंद्र मोदी यांनी धार्मिक स्थळांना स्वच्छ आणि सुंदर बनविण्याचे आवाहन केले. या आवाहनाला प्रतिसाद देत राज्यात तातडीने जिल्हाधिकारी यांच्या पुढाकारातून धार्मिक स्थळांची स्वच्छता मोहिम राबवावी. तसेच मंदिर परिसरात विशेष स्वच्छता मोहिम राबवून विद्युत रोषणाई करण्यात यावी. आठवडाभरात हा बदल दिसायला हवा. तसेच धार्मिक स्थळांवर कायमस्वरुपी स्वच्छता राखण्यासाठी जिल्हा प्रशासनाच्या माध्यमातून विशेष योजना तयार करण्याच्या आणि या योजनेला जिल्हा नियोजन समितीच्या माध्यमातून निधी उपलब्ध करण्याच्या सूचना दिल्या. या योजनेसाठी महसूल विभागाच्या माध्यमातून नोडल अधिकारी नेमून राज्य स्तरावरुन लक्ष ठेवावे, असेही मुख्यमंत्र्यांनी सांगितले.

शहरा बरोबरच ग्रामीण भागाच्या स्वच्छतेसाठी अभियान

आपल्या राज्याला स्वच्छता अभियानात देशात पहिला क्रमांक मिळाला आहे. हा क्रमांक आपल्या राज्याला कायम ठेवायचा आहे. यात सखोल स्वच्छता मोहीम महत्वाची ठरणार आहे. राज्यातील शहरी भागात ही मोहिम आपण राबवत आहोत. या मोहिमेद्वारे एकाच वेळी जादा मनुष्यबळ आणि संसाधने वापरून स्वच्छता करण्यात येत आहे. यामुळे प्रदूषणासोबतच रोगराई सुद्धा कमी होत असून या मोहिमेला जनतेचा चांगला प्रतिसाद लाभत आहे. तसेच यासाठी नगरविकास विभागातर्फे नोडल अधिकाऱ्याची नियुक्ती करुन लक्ष ठेवण्यात येणार आहे. स्वच्छता अभियानात सफाई कर्मचाऱ्यांचे मोठे योगदान आहे. त्यांना प्रोत्साहन द्यायला हवे तेव्हा त्यांच्याकडून अधिक चांगले काम होणार आहे, या मोहिमेचे ते खरे हिरो ठरले आहेत. तसेच राज्यात ही स्वच्छता केवळ शहरी भागापूरती मर्यादित राहायला नको. यासाठी शहराच्या हद्दीलगत तसेच ग्रामीण भागात देखील स्वच्छता मोहिम राबविण्याचे आदेश मुख्यमंत्र्यांनी दिले. या भागांच्या स्वच्छतेसाठी देखील कायमस्वरुपी योजना राबविण्याचे आणि जिल्हा नियोजन समिती माध्यमातून निधी उपलब्ध करुन देण्यात यावा. त्याचप्रमाणे राज्याच्या किनारपट्टी भागातील जिल्ह्यांना किनारा स्वच्छतेसाठी १४ युनिट उपलब्ध तातडीने करुन देण्याच्या सूचनाही मुख्यमंत्र्यांनी दिल्या.

हिट अँड रन या काळ्या कायद्या विरोधात 9 जानेवारी पासून खेड तालुक्यातील चालकांनी स्टेरिंग छोडो आंदोलनाला सर्वात केली होती. त्या आंदोलनाच्या दुसऱ्या दिवशी चालकांनी शहरातील सर्व वाहतूक संघटनांशी चर्चा करण्यासाठी बैठक आयोजित केली होती. या बैठकीला भेट देत आपण चालकांच्या पाठीशी ठामपणे उभे असल्याचे सांगत मनसे नेते वैभव खेडेकर यांनी आपला पाठिंबा त्यांना जाहीर केला.

स्टेरिंग छोडो आंदोलनाच्या दुसऱ्या दिवशी खेड शहरातील चालकांनी एकत्र येत भरणे नका येथील काळकाई मंदिराच्या सभागृहात बैठक आयोजित केली होती. यावेळी या बैठकीला भेट देवून चालकांच्या विविध प्रश्नांवर चर्चा करत मार्गदर्शन केले. यावेळी त्यांनी हा कायदा लादला जात असेल तर चुकीचे आहे. चालक हा जाणीवपूर्वक अपघात करत नसून अपघात हे घडतात. क्वचितच काही अपघात हे घडवले जात असून त्यांना शासन करण्यासाठी न्याय व्यवस्था आहे. हा जुलमी कायदा लागू होऊ नये यासाठी चालक बंधू जो काही प्रयत्न करतील किंवा आंदोलन करतील तेव्हा त्यांच्या पाठीशी आपण ठामपणे उभे राहणार असल्याचे सांगितले. केंद्र शासनाच्या या जुलमी कायद्याला विरोध करण्यासाठी सर्व चालक बांधवांनी आता कंबर कसली असून महाराष्ट्र नवनिर्माण सेनेचे राज्य सरचिटणीस वैभव खेडेकर यांनी पाठिंबा दिल्याने आता चालक बांधवांच्या आंदोलनाला बळकटी मिळण्याची शक्यता अध्यक्ष सुनील शिंदे यांनी व्यक्त केली आहे. यावेळी मनसेचे शहराध्यक्ष ऋषिकेश कानडे, मनसे वाहतूक संघटनेचे जिल्हाध्यक्ष राजा जोयसर हे उपस्थित होते.

अग्ण्येय दिशेकडून येणाऱ्या बाष्पयुक्त वाऱ्यामुळे व पश्चिमेकडून येणाऱ्या थंड वाऱ्यामुळे राज्यात गेल्या 2 ते 3 दिवसापासून हलक्या स्वरूपाचा पाऊस पडत होता. दरम्यान आजपासून पावसाचा जोर कमी होईल. त्यामुळे राज्यातील ढगाळ हवामान कमी होणार असून कोरडे वातावरण निर्माण होण्याचा अंदाज हवामान विभागाने वर्तवला आहे.  त्यामुळे किमान तापमान चार ते पाच अंश सेल्सिअसने कमी होण्याचा अंदाज आहे. प्रामुख्याने विदर्भ आणि उत्तर महाराष्ट्रात गारवा वाढण्याचा अंदाज हवामान विभागाने व्यक्त केला आहे.

प्रांताधिकारी जयश्री मोरे यांना दिले निवेदन

दुकानावर मराठी पाट्या लावण्या संदर्भात सुप्रीम कोर्टाने 4 महिन्यापूर्वी निर्णय दिला होता. मात्र गेल्या 4 महिन्यात या संदर्भात खेड तालुक्यात कोणतीही कारवाई केल्याचे दिसून आले नसल्याने मनसेचे राज्य सरचिटणीस वैभव खेडेकर यांच्या हस्ते या संदर्भात खेडचे प्रांताधिकारी, तहसीलदार व पोलीस निरीक्षक यांना उपोषणास बसणार असल्याचे निवेदन देण्यात आले. महाराष्ट्रातील दुकानावर मराठी पाट्या लवल्या पाहिजेत असा निर्णय मा. सुप्रीम कोर्टाने दिले होते. मात्र खेड तालुक्यातील दुकानावर असलेल्या इतर भाषेतील फलक बदलले गेले नसून त्यावर खेड तालुका प्रशासनाने कोणत्याही प्रकारची कारवाई केल्याचे दिसून न आल्याने महाराष्ट्र नवनिर्माण सेनेने पुढील 7 दिवसात कारवाई न केल्यास येत्या 26 जानेवारी रोजी बेमुदत उपोषणाला बसण्याचा इशारा या निवेदनाद्वारे देण्यात आला आहे. यावेळी मनसेचे महाराष्ट्र राज्य सरचिटणीस वैभव खेडेकर, रत्नागिरी जिल्हा सचिव संतोष नलावडे, दादू नांदगावकर, जयेश गुहागरकर यांच्यासह पदाधिकारी व कार्यकर्ते मोठ्या संख्येने उपस्थित होते.