बॅंक ॲाफ महाराष्ट्रवर भर दिवसा दरोडा, कोट्यावधींच्या दागिन्यासह लाखोंची रोकड लंपास

पुणे जिल्ह्यातील शिरुर तालुक्यामधील पिंपरखेड येथे भर दिवसा दुपारी दीड वाजण्याच्या सुमारास बॅंक ॲाफ महाराष्ट्रवर दरोडा पडला. यावेळी दरोडेखोरांनी बंदुकीचा धाक दाखवत बँकेतील 31 लाख रुपये रोकड तसेच 2 कोटी रुपयांचे सोने पळवून नेल्याची प्राथमिक माहिती समोर आली आहे. संबंधित प्रकार हा बँकेच्या सीसीटीव्ही कॅमेऱ्यात कैद झाला आहे. काळ्या रंगाचे कपडे परिधान केलेले जवळपास पाच आरोपी हे बँकेत शिरले. ते चारचाकी वाहनातून आले होते. त्यांनी तोंड बांधलं होतं. ते बँकेत शिरले तेव्हा त्यांनी बँकेतील कर्मचाऱ्यांना बंदुकीचा धाक दाखवत सर्व कॅश पिशवित भरुन द्यायला सांगितली. तसेच त्यांनी बँकेच्या लॉकरमधील सर्व सोनं पिशवीत भरुन चारचाकी गाडीतून पळून गेले.