खेड शहरात ओल्या व सुक्या कचऱ्याची विल्हेवाट लावण्यासाठी राबवलेल्या विविध उपाययोजनांमुळे खेड नगर परिषदेला राष्ट्रीय पातळीवरील ‘कचरामुक्त शहर’ हा पुरस्कार प्राप्त झाला असून त्यासाठी देशपातळीवर ३६ वे मानांकन प्राप्त झाले आहे. दि २० नोव्हेंबर रोजी नवी दिल्ली येथे समारंभपूर्वक हा पुरस्कार प्रदान करण्यात आला. यामुळे आता स्वच्छतेमध्ये खेडला 3 स्टार अवॉर्ड मिळाला असून नगराध्यक्ष वैभव खेडेकर यांनी शहरवासीयांचे व सर्व नगरसेवकांचे आभार मानले आहेत. हा पुरस्कार स्वीकारण्यास मुख्याधिकारी प्रसाद शिंगटे, स्वछता निरीक्षक शिरगावकर, लियाज भाई खतीब व नगराध्यक्ष वैभव खेडेकर उपस्थित होते.
घनकचरा व्यवस्थापनात अग्रेसर राहिलेल्या येथील नगर परिषदेने अथक परिश्रमातून ‘कचरामुक्त शहर’ हा शासनाचा पुरस्कार प्राप्त केला आहे. या मानांकनाचा दुसऱ्यांदा बहुमान खेड पालिकेला प्राप्त झाला आहे. राज्यातील २५७ नगर परिषदा असून त्यापैकी ६९ नगर परिषदांची निवड या पुरस्कारासाठी करण्यात आली होती. शहरातील कचऱ्याची विल्हेवाट लावायची कशी, याचे उत्तर शोधण्याचा प्रामाणिक प्रयत्न खेड नगर परिषद करत आहे. उपलब्ध साधनसामुग्रीसह स्वच्छता कर्मचाऱ्यांच्या सहभागाने नगर परिषद ओल्या व सुक्या कचऱ्याची योग्य विल्हेवाट लावून शहर स्वच्छ ठेवण्याचा प्रयत्न केला आहे. नगराध्यक्ष वैभव खेडेकर, उपनगराध्यक्ष सुनील दरेकर, स्वच्छता व आरोग्य सभापती प्रशांत कदम, प्रभारी मुख्याधिकारी देवानंद ढेकळे, स्वच्छता निरीक्षक महेंद्र शिरगावकर यांसह सर्व नगरसेवक व स्वच्छता विभागाचे कर्मचारी ‘स्वच्छ खेड- सुंदर खेड’ संकल्पना सत्यात उतरवण्यासाठी झटत आहेत. तत्कालीन मुख्याधिकारी प्रसाद शिंगटे यांच्या योगदानातून विविध योजना राबवण्यावर भर देण्यात आल्याने घनकचरा व्यवस्थापनात ही नगर परिषद सरस ठरली. दिल्ली येथून आलेल्या सर्वेक्षण समितीने याबाबतचा अहवाल वरिष्ठ पातळीवर सादर केल्यामुळेच न.प. कचरामुक्त शहर मानांकन प्राप्त झाले. यापूर्वीही नगर परिषदेने विविध मानांकने प्राप्त केली आहेत. या पुरस्काराबद्दल शहरासह तालुक्यातून खेड न. पं.चे अभिनंदन होत आहे.
TIMES MARATHI NEWS 